|
|
| |||||||||||||||||||||||||||||||||||||||||||
|
Napule è tutta rampe (omaggio alla città natale) Napule è tutta rampe, scalinate, scale, gradune, grade, gradiatelle, sagliute, scese, cupe, calate, sicule ‘e coppa, ‘e sotto, viculille, sicule storte, sicule cecate. E song’ ‘a centenare ‘e sicule ca nun spontano, o c’ ‘o purtone ‘nfunno a spuntatora. Allèro o disperato, tu saglie Sempre a Napule; fai na rampa, n’ata, po’ n’ata ancora ca te leva ‘o sciato. Jastimme e cunte ‘e grare, e ghiastemmanno sempre Napule a vide crescere tra rampa e rampa tanta filèr’ ‘e panne spase, una culata ‘e case. ‘O mare se fa cielo attuorn’ ‘a sti pprete appese ca dirupano, una fiumara ‘e strade. Sott’ ‘o sole ca coce Nun scorge cchiù nu viculo, na grara, na calata, nu vico stuorto, nu viculo cecato: ‘e vvie so tutt’ ‘e stesse, mez’ombra e meza luce, e ogni tanto na voce, o nu tramme su lagno ca saglienno saglienno allimma ‘e cchiaste int’ ‘e vutate mettenno luntananza fra nu balcone e n’ato. È na delizia, o core te s’allarga, e cu dduje surse t’ ‘a bive tutta Napule cu na sola guardata. Ma chesto che vo’ dì, si Napule è tutta na sagliuta, tutta gradinate, vicule muorte, viche ca nun spontano, vicule stuorte, vicule cecate? E ‘o sole, sì, se ferma for’ ‘e ccase, ma resta semp’ ‘a fora, e si pe poco ce trase, rimane affà curnice, pecché nun se po’ ‘mpezzà mmiez’ ‘a sti porte nere. E c’adda j’ a vedé? Chi more, chi figlia, chi se ‘nzora, senza nu matarazzo, senza nu cuscino, pe’ terra, ‘mmocc’ ‘a porta, oppure sott’ ‘a n’àndito, o arèto a nu cummò ca fa parete, tra gamme e scarpe ca strusciano e s’entroppano, tra tutte chesti vocche ca strillano, si magnano quanno magnano; si dormono quanno dormeno; pecché allucca e smania, e maje trov’arricietto chi nun tene nu lietto, e chi maje nun mett ‘nzieme nu muorz’ ‘e pane e pace; ch’è peggio e nun tené cielo ‘a vedé e terra ‘a cammenà. Saglite? E sì, saglite a Sammartino, facitele a ddoje a ddoje sti scalinate! Anze, pe fa cchiù ampresso, pigliatavella sta funniculare. Chella v’annaria cumm’ ‘a na cumeta; e allà ‘ngoppa nun ve fa addunà si sta calanno sera, quanno e lluce s’appicciano, spurtusanno feneste, sfunnann ‘ogne purtone, facenn’ unu sfraciello ca pare tutta na festa ‘e lampetelle cumm’a vermenare; mentr’annascuso chi se ‘mpegna o cummò, chi aniello a ffede, a catenella cu ‘a Madonn’ ‘o Carmene, na vrenzola, nu scialle, a vest’ ‘e sposa, o lunzuolo cu a cifra, sei federe o nu scanno. Robba, ca nun serve cchiù, ‘e ssiente e dicere, si ‘e ‘ncuocce ‘ncopp’ ‘o fatto, dint’ ‘o ‘impigno, oppure ‘nnanz’ ‘a sporta ‘o sapunaro; ma chianu chianu, manco te n’accuorge sti vasce a liev’ ‘e miette se svacantano; e mentr’ ‘e figlie cresceno, e fanno tant’ ati figlie, e bracce s’atturcigliano aspettanno. Intanto ‘o tiempo passa, e ‘e vocche se spalancano a migliare: a famma, senza scuorno, se strascina porta pe’ porta, mo’ cu nu battizzo, mo’ na malatia. E ogni ghiuorno ‘na morte, ‘n’allucco, o parapiglia, n’ammuina. O è sulo votta-votta e fuja-fuja, senza ragione, senza nu mutivo? C’è stato o no nu sparo? Nu schianto all’intrasatta, ca pare ‘o terremoto? O nu palazzo affonna, o s’è aperto n’abbisso int’ ‘a nuttata. Torna indietro |
||||||||||||||||||
| ||||||||||||||||||||||||||||||
|
